ភ្នំពេញ៖ ប្រទេសកម្ពុជា មិនមែនស្ថិតក្នុងស្ថានភាពបំណុលវ័ណ្ឌកនោះទេ បើប្រៀបធៀបនឹងប្រទេសមហាអំណាចសេដ្ឋកិច្ចដូចជាអាមេរិក និងបារាំង ព្រោះបច្ចុប្បន្នបើគិតពីបំណុលក្នុងមនុស្ស សម្រាប់ប្រទេសកម្ពុជាយើង គឺមានប្រមាណតែ ៣៨០ដុល្លារអាម៉េរិកប៉ុណ្ណោះ ខណៈអាម៉េរិកមានរហូតទៅដល់ជាង ៥ម៉ឺនដុល្លារអាម៉េរិកក្នុងម្នាក់ បារាំងជាង៨ម៉ឺនដុល្លារក្នុងម្នាក់ ហើយនិងអូស្រ្តាលីក៏ជាង៥ម៉ឺនដុល្លារអាម៉េរិកផងដែរ។
និយាយជារួមនៅក្នុងតំបន់ គឺមានតែកម្ពុជាទេដែលមានទំហំបំណុលតិចជាងគេបើគិតពីអនុបាត បំណុលធៀបនឹងចំណូលថវិកាជាតិ គឺមានប្រមាណតែ ៤ភាគរយ នៃ ផ.ស.ស ប៉ុណ្ណោះ។ នេះបើយោងតាមប្រសាសន៍របស់ឯកឧត្ដម វង្សី វិស្សុត រដ្ឋមន្ត្រីស្តីទីនៃក្រសួងសេដ្ឋកិច្ចនិងហិរញ្ញវត្ថុបានថ្លែងក្នុងវេទិកាសាធារណៈស្តីពីស្ថានភាព និងការគ្រប់គ្រងមីក្រូសេដ្ឋកិច្ច និងថវិកាសម្រាប់ឆ្នាំ២០១៦ នាព្រឹកថ្ងៃទី១៨ ខែកុម្ភៈ ឆ្នាំ២០១៦។
យោងតាម AKPឯកឧត្តមបានលើកឡើងទៀតថា កម្ពុជាត្រូវបានស្ថាប័នហិរញ្ញវត្ថុអន្តរជាតិចាត់ទុកថា ជាប្រទេសគំរូមួយដែលបាន គ្រប់គ្រងបំណុលសាធារណៈរបស់ខ្លួនបានយ៉ាងល្អ ហើយយើងទទួលបាននូវអញ្ជើញជាបន្ត បន្ទាប់ទៅចែករំលែកបទពិសោធន៍អំពីការគ្រប់គ្រងបំណុលនេះ។
ជាក់ស្តែង កម្ពុជាដែលជា ប្រទេសមួយមានហានិភ័យបំណុលកម្រិតខ្ពស់បំផុតនៅដើមទសវត្សរ៍ ទី៩០ ឥឡូវនេះបាន ក្លាយជាប្រទេសមួយដែលហានិភ័យបំណុលកម្រិតទាបនៅក្នុងប៉ុន្មានឆ្នាំចុងក្រោយនេះ។ អត្រាអនុបាតបំណុលធៀបនឹង ផ.ស.ស នៅដើមទសវត្សរ៍ឆ្នាំ៩០ ដែលមានរហូតទៅដល់ ប្រមាណ៩០ភាគរយ ត្រូវបានធ្លាក់ចុះមកត្រឹមប្រមាណ ៣០ភាគរយនៅក្នុងឆ្នាំ២០១៥ហើយបើគិតតាម តម្លៃបច្ចុប្បន្នមានប្រមាណតែ២៣ភាគរយប៉ុណ្ណោះ ធៀបនឹងអនុបាតគោល៤០ភាគរយ។
ជារួមយើងមានគោលការណ៍ក្នុងការគ្រប់គ្រងបំណុលច្បាស់លាស់ ពិសេសការអនុវត្ត ជាប់ជាប្រចាំនូវគោលការណ៍គន្លឹះចំនួន ០៤យ៉ាង គឺ ១-ត្រូវខ្ចីឥណទានក្នុងទំហំសមស្រប ដែលស្ថានភាពថវិកា និងសេដ្ឋកិច្ចអាចទ្រាំទ្របាន, ២-ត្រូវខ្ចីតែឥណទានដែលមានកម្រិត សម្បទាន និងលក្ខខណ្ឌអនុគ្រោះខ្ពស់, ៣-ត្រូវខ្ចីសម្រាប់តែវិស័យអាទិភាពដែលទ្រទ្រង់ចីរភាពកំណើន និងបង្កើនផលិតភាពសេដ្ឋកិច្ច និង៤-ត្រូវប្រើប្រាស់ឥណទានទាំងនោះ ប្រកបដោយតម្លាភាព, គណនេយ្យភាព, ប្រសិទ្ធភាព និងស័ក្តិសិទ្ធិភាពខ្ពស់បំផុត។ យើងបានអនុវត្តនូវគោលការណ៍ទាំង០៤នេះ តាំងពីមុនការរៀបចំយុទ្ធសាស្ត្រគ្រប់គ្រងបំណុលសាធារណៈមកម្ល៉េះ។
រដ្ឋមន្រ្តីស្តីទីរូបនេះបានសង្កត់ធ្ងន់ថា ប្រទេសដែលឯករាជ្យខាងថវិកា មិនមែនបាន ន័យថាប្រទេសនោះត្រូវឈប់ខ្ចីបុលគេនោះទេ ប៉ុន្តែមានន័យថា ប្រទេសនោះមានលទ្ធភាព ក្នុងការខ្ចី និងសងបំណុលគេវិញ ហើយយកកម្ចីទាំងនោះទៅវិនិយោគបម្រើឱ្យការអភិវឌ្ឍប្រទេស។ កម្ចីពីប្រទេសចិន គឺមានលក្ខណៈឆ្លើយ តបទៅនឹងស្ថានភាព និងតម្រូវការជាក់ស្តែងរបស់កម្ពុជា ជាពិសេសការអភិវឌ្ឍហេដ្ឋារចនាសម្ពន្ធទ្រទ្រង់ដល់កំណើនសេដ្ឋកិច្ច៕
ប្រភពពី: khmer-press
