ដូចការគ្រោងទុក នៅព្រឹកថ្ងៃសុក្រ ទី០៥ ខែមិថុនា ឆ្នាំ២០១៥នេះ កិច្ចប្រជុំពេញអង្គគណៈរដ្ឋមន្រ្តី បានប្រព្រឹត្តឡើងក្រោមអធិបតីដ៏ខ្ពង់ខ្ពស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា បានអនុម័តទៅលើសេចក្តីព្រាងច្បាប់ស្តីពី «សមាគម និងអង្គការមិនមែនរដ្ឋាភិបាល» ។ សេចក្តីព្រាងច្បាប់នេះ មាន០៩ជំពូក និង៤១មាត្រា ក៏ប៉ុន្តែ០២មាត្រា ត្រូវបានលុបចោលនៅសល់តែ ០៩ជំពូកដដែល និង៣៩មាត្រតែប៉ុណ្ណោះ ក្នុងនោះក៏មានការកែសម្រួលពាក្យពេជន៍មួយចំនួនផងដែរ ហើយសេចក្ដីព្រាងច្បាប់នេះ នឹងបញ្ជូនទៅរដ្ឋសភាដើម្បីអនុម័ត នាសប្តាហ៍ក្រោយនេះ។
ទិសដៅ និងគោលបំណងនៃសេចក្ដីព្រាងច្បាប់ស្ដីពី «សមាគម និងអង្គការមិនមែនរដ្ឋាភិបាល» អនុលោមតាមរដ្ឋធម្មនុញ្ញ នៃព្រះរាជាណាចក្រកម្ពុជា ត្រង់មាត្រា ៤២ បានបញ្ញត្តិថា ប្រជាពលរដ្ឋខ្មែរ គ្រប់រូបមានសិទ្ធក្នុងការបង្កើតសមាគម និងគណបក្សនយោបាយ ហើយសិទ្ធនេះត្រូវកំណត់ដោយច្បាប់ និងមាត្រា២០ នៃសេចក្ដីប្រកាសជាសកលស្ដីពីសិទ្ធិមនុស្ស ព្រមទាំងមាត្រា២២ នៃកតិកាសញ្ញាអន្តរជាតិ ស្ដីពីសិទ្ធប្រជាពលរដ្ឋ និងសិទ្ធនយោបាយ បានធានាដល់សិទ្ធរួបរួមគ្នាជាសមាគមរបស់ប្រជាពលរដ្ឋនៃរដ្ឋហត្ថលេខី ដែលតម្រូវឲ្យមានច្បាប់មួយជាចាំបាច់ សំដៅផ្តល់សិទ្ធក្នុងការបង្កើតសមាគម និងសម្រាប់ការពារ ការអនុវត្តសិទ្ធនេះ កុំឲ្យមានការរំលោភបំពានណាមួយ។
រាជរដ្ឋាភិបាលបានទទួលស្គាល់ពីសារៈសំខាន់នៃការចូលរួមរបស់អង្គការសង្គមស៊ីវិល ដោយចាត់ទុកជាដៃគូមួយដ៏មានសក្ដានុពល និងប្រសិទ្ធភាពក្នុងកិច្ចដំណើរការស្ដារ និងអភិវឌ្ឍន៍ សេដ្ឋកិច្ច សង្គម និងលើកស្ទួយគាំពារគោលការណ៍ប្រជាធិបតេយ្យនូវការគោរពសិទ្ធមនុស្ស។ ជាក់ស្ដែងចាប់តាំងពីឆ្នាំ១៩៩៣ រហូតមកដល់បច្ចុប្បន្ន សមាគម និងអង្គការមិនមែនរដ្ឋាភិបាលដែលបាន និងកំពុងធ្វើ សកម្មភាពនៅក្នុងព្រះរាជាណាចក្រកម្ពុជា មានចំនួនសរុបប្រមាណ ៥.០០០ ក្នុងនោះរួមមានទាំសមាគម និង អង្គការមិនមែនរដ្ឋាភិបាលក្នុងស្រុកដែលបានចុះបញ្ជីនៅក្រសួងមហាផ្ទៃ និងទីស្ដីការកណៈរដ្ឋមន្រ្តី និង អង្គការមិនមែនរដ្ឋាភិបាលបរទេស ដែលបានចុះអនុស្សរណៈនៅក្រសួងការបរទេស និងសហប្រតិបត្តិការ អន្តរជាតិ។
អង្គការអន្តរជាតិដែលទទួលបានចុះអនុស្សរណៈ ជាមួយក្រសួងកិច្ចការបរទេស និងកិច្ចសហប្រតិបត្តិការអន្តរជាតិ មានចំនួន៤៤១អង្គការ ។ ការចុះបញ្ជី និងការចុះអនុស្សរណៈកន្លងមកនេះ ពុំមែនជាការចុះបញ្ជីដើម្បីផ្តល់ឋានៈជានីតិបុគ្គល ដល់សមាគម ឬអង្គការមិនមែនរដ្ឋាភិបាលនោះទេ គឺគ្រាន់តែជាការតម្កល់ទុកសំណុំឯកសារ និងទទួលស្គាល់ការធ្វើសកម្មភាពរបស់សមាគម និងអង្គការមិនមែនរដ្ឋាភិបាលទាំងនោះតែប៉ុណ្ណោះ។
សេចក្ដីព្រាងច្បាប់នេះ មានគោលបំណងធានាការពារសិទ្ធសេរីភាព ក្នុងការបង្កើតសមាគម និង អង្គការមិនមែនរដ្ឋាភិបាល នៅក្នុងព្រះរាជាណាចក្រកម្ពុជា ដើម្បីការពារផលប្រយោជន៍ស្របច្បាប់របស់ខ្លួន និងការពារផលប្រយោជន៍សាធារណៈ ព្រមទាំងលើកកម្ពស់កិច្ចសហប្រតិបត្តិការក្នុងភាពជាដៃគូរវាង សមាគម ឬអង្គការមិនមែនរដ្ឋាភិបាល ជាមួយអាជ្ញាធរសាធារណៈ និងមានគោលដៅកំណត់បែបបទទទួល ស្គាល់តាមផ្លូវច្បាប់ដល់សមាគម និងអង្គការមិនមែនរដ្ឋាភិបាល។ ជាច្រើនលើកច្រើនសារ ព្រមទាំងបានដាក់ជូនសិក្ខាសាលាពិគ្រោះយោបល់ថ្នាក់ជាតិចំនួន២លើក ដោយមានការចូលរួមយោបល់ពីតំណាងសមាគម និងអង្គការមិនមែនរដ្ឋាភិបាល និងអង្គការសង្គមស៊ីវិលជាតិនិងអន្តរជាតិ តំណាងស្ថានទូត រដ្ឋទូត តំណាងសមាគមន៍អឺរ៉ុប តំណាងការិយាល័យឧត្តមស្នងការ សហប្រជាជាតិទទួលបន្ទុកសិទ្ធមនុស្សប្រចាំកម្ពុជា និងតំណាងមកពីក្រសួង ស្ថាប័នពាក់ព័ន្ធ។
ប្រភពពីទស្សនាវដ្តីប្រជាជនកម្ពុជា
